家長伸手入夾公仔機偷公仔　網民批評她教壞小朋友

【點新聞報道】網上近日流傳一段影片，可見一名女子在遊戲機中心疑偷公仔被斷正後，竟辯稱「如果唔攞嘅話啲公仔都係去堆填區」，後來又嗆聲稱「你唔畀我攞係到睇一睇，跟住擺返好架咩？」，被不少網民批評教壞小朋友。

有網民上周日(30日)在社交平台threads以「身教嘅重要性...真心覺得唔識教唔好生」為題發文，表示當日前往冒險樂園玩，發現一名女子攜同小朋友，踎在地上伸手入夾公仔機底部，企圖扯出公仔，「其實呢位姐姐踎喺度，整咗好耐但係我哋喺隔離玩嘅時候冇留意，跟住再望一望發現佢原來喺度扯緊個公仔出嚟」。

樓主於是出聲制止，惟對方竟然理直氣壯地說：「攞公仔...如果唔攞嘅話啲公仔都係去堆填區」。樓主批評「估唔到今時今日仲可以咁明目張膽」，慨嘆「大佬呀，你帶住個小朋友 明唔明咩叫身教...」。

從其上載的影片中，樓主和朋友上前制止該女子：「你唔可以咁嘅喎……你攞緊咩呀？」對方理直氣壯地回應：「公仔囉！」。樓主遂解釋「要夾中先叫職員嚟攞㗎喎」，該女子則反駁稱：「佢話免費㗎喎，網上講有十次機會㗎嘛。」據悉，女子所指的是該分店因結業推出的向會員贈送代幣活動。

然而，樓主告知該女子「唔係咁樣自己掹喎」，對方就辯稱：「都就嚟執囉，啲公仔都送去堆填區㗎喎。」樓主立即指斥：「咁唔等於你可以咁樣攞，你呢個行為係偷喎！」該女子後來放下已拉出的公仔，職員趕到了解情況，她就大聲夾惡主動話「咁報警囉」，又辯稱「個問題係我無攞走喎，你唔畀我攞係到睇一睇，跟住擺返好架咩？」樓主則表示，是否報警會交由店方決定。

影片惹來不少網民熱議，「公仔一個，何必以身犯險？教壞咗個女第日偷嘢，今次無事，下次啲人揸正做個女就留案底了，為乜呢？」、「真係好肉酸！」、「帶住啲仔女都做啲偷嘢行為，仲大條道理覺得自己啱，生仔要考牌」。不少網民亦好奇職員如何處理，樓主在留言表示，最後職員與該女子進行溝通，並指出有關行為的不當之處，最終沒有報警處理。