中環單車男逆行扶手電梯　網民怒轟無品自私

【點新聞報道】網上近日流傳上一段影片，顯示一名單車男無視中環半山扶手電梯上眾多使用者，竟揸住架單車逆線行，沿途撞到不少途人，行為極度自私。

有網民在社交平台threads上載一段影片，事發地點相信是中環半山扶手電梯，當時扶手電梯正在向上移動，可見一名戴頭盔、口罩，一身黑衣打扮的男子，卻揸住架單車逆線行，不斷在扶手電梯左穿右插，有搭客更匆忙讓路，情況十分危險。

樓主在帖文表示，「點解有啲人可以咁自私？？！我都好少咁嬲，但見到呢種人真係睇唔過眼，連續三條行人電梯都揸住架單車逆線行，跟住沿途撞到不少途人，同埋小朋友，已經有好多人大聲叫住佢停，但佢都無視所有人好彩冇真係令人受傷，但呢個行為真係好自私，喺中環沿途見到呢個人嘅人，小心啲！」。

樓主斥單車男有恃無恐，「佢走得太快，其實有好多人嗌停佢，但始終係行人電梯係郁緊上緊去，佢直撞啲人，阻唔到佢好危險，跟住佢恃住自己有架車，去到平地就算有人攔住佢，佢係直接衝走」。

事件引發網上熱議，不少人留言表示「單車友點解黑人憎係有原因嘅」、「成日都覺得呢啲人係咪以為自己好很型，到底係面皮有幾厚，先會做埋呢啲嘢」、「咁無品垃圾，夠膽唔好帶口罩」、「不停咁撞到人，強烈需要報警處理喎 」。