吳業坤追利是不獲理會　家燕姐終極送上狂喜

【點新聞報道】吳業坤（坤哥）今日（5日）到新城宣傳新歌，接受薛家燕、范振鋒、思敏主持的《開心大派對》節目。家燕姐大讚坤哥多才多藝，而最令家燕姐激讚坤哥苦練空手道5年，最近出戰全運會香港選拔賽奪第四位，坤哥感謝完家燕姐讚賞，隨即搞笑地問家燕姐攞利是，家燕姐就哈哈大笑沒理會他。

坤哥表示，屈指一算15年前參選「超級巨星」歌唱比賽，時間過得好快：「自細鍾意唱K，咩都唔叻，唯一同學仔會讚的就係唱K。嗰時教會一百元教四堂唱歌，好抵，因為咁入咗教會。之後用咗二百元買了一把木結他，夢想就係由呢把木結他，每一小步開始。」

家燕姐又言關心他的「家庭計劃」，他表示與太太商量過生育問題，只是暫時好多工作，並說：「要財務自由先，雖然暫時財務尚算OK。同埋我哋要諗清楚會否移居日本。」

再談到坤哥4月18日生日要開工拍劇，坤哥即刻九秒九精靈地再望着家燕姐𢭃生日利是，家燕姐大笑說：「佢話生日就望住我，哈哈！」坤哥爆笑地纏着家燕姐唔放：「家燕姐，依家可以用手機支付，唔好話冇現金。」

坤哥向家燕姐追討利是3、4次都不成功，原來家燕姐早有準備，早已秘密地把兩封利是「攝」在背後，在節目完結大合照時，突然取出兩封大利是，送給坤哥祝賀生日及恭喜他在全運會香港選拔賽奪第四位，坤哥驚喜又意外得尖叫，開心大叫：「得到家燕姐祝福利是，好開心呀，仲要係雙封！我一定會好好收藏！」

（點新聞特約記者陳惠芳報道）