筆是機場｜美關稅戰對打全世界　特朗普硬拖3億國民做炮灰

文/稀思路

近日，喺美國出現兩股潮流，兩股潮流之間相關，甚至係源於同一件事。第一股潮流係美國各地出現反對特朗普示威；第二股潮流係美國各地都有人搶購中國商品，點解會咁？因為美國總統特朗普又打關稅戰，有人示威反對佢，亦有人怕之後買中國貨會好貴，所以買定先。

有份呼籲人去搶中國貨或其他貨品嘅，唔止係一般的美國群眾，而係連美國億萬富豪庫班都有份講；搶購場面都幾誇張下，由牙膏到肥皂，以至係家電產品都被搶購，有美國人走勻成個紐約，終於搶到一部中國品牌嘅電視。美國正式實施關稅政策，稅款會落美國政府袋，而畀貴價錢買中國貨嘅就係市民，如果筆者係美國人，應該都會搶埋一份。

如果想具體化呢種價錢差異，筆者就用嗰位紐約居民搶嘅中國品牌電視為例，相同尺寸，中國品牌大約180元美金；如果係韓國品牌，見到有超過300元美金，單單係價差，就接近1000港元，呢種價差說明什麼？說明美國一直受惠於中國品牌嘅平價好貨！

特朗普要加關稅，尤其係想針對中國，攞貿易逆差嚟講，表面上講到美國「送錢」畀中國企業咁，但讀者們諗真啲，其實係中國一直賣緊平貨兼好貨畀美國；如果美國唔買中國貨，或者要強徵大額關稅，其實由美國企業（要購入元件等）到民間，統統都會受害。

如果讀者們有留意呢幾日新聞，會留意到中國係第一個果斷出招反制美國嘅國家，措施包括加徵美國關稅、限制稀土出口等；呢啲措施係咪有力？肯定有，因為特朗普一聽到就發瘋，話要再加中國關稅，但中國根本就唔怕。

外交部發言人指出，貿易戰、關稅戰沒有贏家，保護主義沒有出路。中國人不惹事，也不怕事，施壓、威脅和訛詐不是同中方打交道的正確方式。中方必將採取必要措施堅決維護自身正當合法權益。如果美方置兩國和國際社會利益於不顧，執意打關稅戰、貿易戰，中方必將奉陪到底。

就算唔熟國際關係，有一樣嘢其實好易分析到，就係特朗普第一次做美國總統時，已經向中國發起過關稅戰；今次佢再上任，事隔幾年，中國可能冇準備咩？要合作，中國歡迎；要針對，中國亦唔會退縮。

兩日前，筆者喺網上睇咗條分析視頻，先不論人口數字係咪準確，博主就話美國依家玩封閉，3億人（美國人口）可以鬥得贏其他77億人（中國及其他國家）咩？如果美國靠自己搞創新科技，其他國家高度合作，最後中國一定會取代美國。筆者覺得，依家嘅特朗普就係一個「窮」字，特朗普本身係富豪點會「窮」？窮兵黷武呀！