筆是機場｜白鴿黨解散仍不知悔改　全民必須堅守國家安全底線

文/稀思路

近日，新加坡人力部長陳詩龍喺國會總結人力部開支預算辯論時，引用港產片《江湖》（劉德華、張學友主演）嘅對白直懟一名議員，話佢「講，你又唔聽；聽，你又唔明；明，你又唔做；做，你又做錯；錯，你又唔認；認，你又唔改；改，你又唔服；咁你要點呀？」頓時成為新聞焦點，其實喺政界，不論各地，包括美國以至香港，總有啲政客「講，你又唔聽；聽，你又唔明；明，你又唔做」，如果要筆者舉例子，就一定包括要解散都未知悔改嘅民主黨。

周日（13日），民主黨召開特別會員大會，逾九成出席會員通過授權中委會進一步跟進解散嘅事，民主黨要蓋棺，基本上已成定局，筆者留意嘅細節，係民主黨走到今天，走到末路，一眾領導、前領導都唔知錯，扮無辜；但一個香港政黨好地地，點解要解散，因為參與違法行動，被社會唾棄先真呀。

喺唔同報道，筆者搵到民主黨領導、前領導嘅一啲公開說話，讀者們可以先睇睇：

黨主席羅健熙：該黨以市民的想法為依歸，一直希望服務港人、做有利社會的事情；港人自會評價不同政黨 ...

黨元老李華明：捱下去都很難捱，亦不想中委會受到「不必要的迫害」...

前主席劉慧卿：不開心，對民主黨如今要走上準備解散程序表示很氣憤，認為「一國兩制」應容得下民主黨 ...

如果睇呢幾位民主黨人士嘅口氣，有人可能會以為民主黨「畀人搞」，但筆者必須點出，由民主黨醞釀解散至今，甚至係黑暴運動至今，從來都冇承認過，自己唔應該參與黑暴運動；將時間線拉長啲，其實由2014年非法「佔中」開始，民主黨就積極參與其中，一直到2019年黑暴運動，根本民主黨已經唔可以話自己係「和理非」（和平、理性、非暴力）政黨。一個核心成員曾經高度參與黑暴嘅政黨，想生存，想參選，唔係用把口叫社會各方畀機會，而係應該先承認自己唔應該「黑化」，唔應該參與違法行動。

用支持者基礎嘅角度睇，民主黨仲有一個位「自己知」，但無對外承認或透露嘅事實，就係民主黨喺社會冇乜支持可言，報道都有寫，民主黨曾經係喺立法局有19個議席嘅「第一大黨」，但讀者們都會諗到，社會以至選民支持嘅，係「和理非」嘅民主黨，當民主黨唔再堅持和平、合法，而講激進又唔夠激進攬炒派嚟，非驢非馬，支持基礎仲喺邊呢？

今日（15日），係國家第十個「全民國家安全教育日」，喺呢個日子，想到民主黨嘅解散，提醒咗我哋，只要有人、有政客等挑起矛盾同事端，國家安全就有可能受到威脅，當曾經出名「溫和」嘅民主黨，其（前）議員都可以走在暴動現場為暴徒擋住警察，邊個會估到以後會唔會有其他人、組織喺社會作亂呢？唯有一直堅守國家安全底線，亦唯有好好教育下一代，喺法律、教育並重嘅情況下，香港以至國家安全，先能夠得到最大嘅保障。