文/稀思路
讀者睇到稀思路呢個標題，可能會覺得「稀思，好似有啲核突喎」，但各位唔好誤會，呢條題真係同新聞有關，而且出自美國總統把口。件事係咁嘅，美國總統特朗普發起關稅戰，除咗中國企硬，唔少國家都向美國示弱，要求談判，於是扮得戚嘅特朗普，日前（8日）就喺共和黨內部晚宴上，話好多國家忙住「拍我馬屁」(Kissing my ass)，請求達成協議。坦白講，堂堂一個美國總統，話其他國家為咗減關稅，要去到Kiss his ass嘅地步，一啲國家領導可以忍，但中國呢？Sorry，唔會忍，必反制！
根據新聞報道，特朗普當時嘅講法係有超過70個國家搵美國，打電話畀佢哋，「kissing my ass」，唔知特朗普有冇講大話，佢仲話有啲國家講「總統先生，請達成協議，我願意做任何事，我願意做任何事，總統先生」(Please, Sir, make a deal. I’ll do anything. I’ll do anything, Sir)；越吹越大嘅特朗普，又揚言佢第二個總統任期係美國史上「最成功嘅100日」。
如果係平常人對待平常人，話其他人「拍我馬屁」(Kissing my ass)，基本上已經係侮辱，美國作為超級大國，平時恃強凌弱，其他國家都知嘅，依家特朗普講得仲肉酸，話其他國家為咗達成協議，可以「親吻其屁股」、「願意做任何事」，貿易的確係掌控住好多國家嘅命脈，但如果受到侮辱仲要跪低，其實係正中特朗普嘅下懷。
喺美國發動嘅關稅戰，全球唯一完全無跪低過嘅，就係中國，筆者唔想講太長歷史，但由1840年年代開始，鴉片戰爭、八國聯軍入侵、日本侵華等等，其實中國已經歷超過百年滄桑，當中清政府每退一步，列強就更進一步，面對美西方國家，大家都知道越退越死。反而，好似抗美援朝咁，硬撼係有犧牲，但亦係唯一應對方法。
近幾十年嘅美國，有一個軌跡，讀者們可以重溫下歷史，美國帶頭建立現代嘅國際同貿易體系，曾經擔當住「世界警察」角色；但讀者們睇下佢哋同一啲國家嘅交集，就會發現同今日中國異常相似。二戰一結束，基本就進入冷戰時期，世界得兩個超級大國，就係美國同蘇聯，兩個國家鬥咗幾十年，最後係蘇聯解體，美國全球「獨大」。
除咗蘇聯，就算唔係軍事、國際影響力，經濟上挑戰到美國，都係「唔得」，二戰後嘅日本，根本就係奇跡般發展，工商業極度發達，由汽車到電視機等，都有超越美國嘅勢頭，喺上世紀80年代，甚至有個講法，係日本賣咗東京，就夠錢買晒成個美國；咁挑戰到美國經濟地位，就算日本係美國盟友，美國一樣利用迫日圓升值等手段整死日本，慘慘豬嘅係，日本畀美國「做低」之後，就迷失咗至少30年。
今日嘅中國，喺軍事、經濟以至科技方面，都有力挑戰到美國，點解美國要狂加中國關稅？真係剩係貪啲稅收？錯喇，美國係要「做低」中國，以保留其全球領先地位，如果單純以為呢個係貿易逆差問題，就真係太樂觀喇！筆者覺得，當美國想迫中國埋牆角，中國唯有反制、抵抗，中國人唔會好似美國咁黑心成日想其他人死，但美國亦唔好諗住「能欺負就欺負」。
中央港澳工作辦公室主任、國務院港澳事務辦公室主任夏寶龍講得十分有道理，美國不是要我們的「稅」，而是要我們的「命」。讓美國那些「鄉巴佬們」在中華民族五千年文明面前去哀鳴吧！筆者認為，如果特朗普要我哋Kiss his ass（拍他馬屁），我哋應該做嘅，係KICK HIS ASS（狠狠教訓他）先啱！
收藏
取消收藏
分享
