為DSE考生提供貼士　雲浩影黃淑蔓籲切忌捱夜

【點新聞報道】「寰亞孻女」黃淑蔓（Feanna）為DSE考生們在寰亞音樂的YouTube Channel開Live唱歌和傾偈，本周邀請「仙氣女神」雲浩影（Cloud）擔任嘉賓。

Cloud分享溫書心得，說：「我唔贊成考試前夕通宵讀書，我考DSE嗰陣晚上九點瞓，半夜三點起身，養足精神去溫習，更容易入腦。」Feanna說：「我都唔贊成通宵讀書，因為我試過讀到五點，仲有兩小時就要去試場，結果通宵無瞓好無精神。所以適當嘅溫書計劃係好重要，唔好臨急抱佛腳。」

她們又談到最難忘考試期間老師的打氣金句，Feanna說：「老師話：不要在吃苦的年紀選擇安逸！我覺得好有意思，我哋而家就係可以吃苦嘅年紀，即係『少壯不努力，老大徒傷悲』！」Cloud說：「我最記得老師同我講，凡事盡力而為，就算唔成功都唔會世界末日！而我自己就想同各位考生講：『活在當下』，如果呢一刻溫書好攰就去休息吓，唔好諗返轉頭，亦都唔好擔心未來，做好而家呢一刻就得啦！」她透露會一邊吃喜歡的零食和飲珍珠奶茶，一邊溫習。

有留言建議寰亞音樂歌手一同舉行演唱會，她們拍手叫好。又有留言問公司哪位男歌手最靚仔？她們異口同聲「馮允謙」，Feanna說：「因為我哋喺公司係同一team，我私心投Jay！」Cloud笑說：「Jay係我哋公司『最上鏡先生』，因為佢個頭最細，我個頭都唔算大，但係同佢一齊做嘢都真係幾難做！」

（點新聞特約記者陳惠芳報道）