文/稀思路
喺經典商戰港劇《創世紀》入面，富豪霍景良有句傳頌廿幾年嘅金句，「朝朝9點鐘逼車返工，每個月都係賺一萬幾千，死慳死抵買股票，妄想一朝發達，佢哋根本唔知真正嘅贏家係邊個！」呢句對白串得嚟，當然係啲富豪級人馬完全睇唔起小股民，雖然只係電視劇對白，但「內容又過於真實」，喺股票市場，從來都係大鱷食散戶，如果讀者睇下最近一個月美國股市發生嘅事，可能更加會諗，美國一班寡頭賺到笑呵呵，難為小股民每日都要坐過山車，隨時輸身家。
喺美國總統特朗普發動關稅戰無耐，其實已經有人質疑，係咪美國一班寡頭夾埋特朗普「搵水」，當美股、美債狂插之時，特朗普就似乎冇因為股市波動而擔心，仲高調向人炫耀，佢嘅好友兼投資人查爾斯・施瓦布（Charles Schwab），喺股市波動之中，「一天內賺了25億美元（約195億港元）」，立即引發社會嘩然，仲有人批評特朗普好似將股市作為權貴「提款機」咁，有眾議員議員更質疑，特朗普政策「轉彎」，到底事前有幾多美國富豪知道，市場資訊有冇被濫用。
再睇下相近日子美國發生咩事，美股喺4月9日大漲前，特朗普就宣布暫緩對部分國家「對等關稅」，但宣布政策變化前，佢就喺自己嘅「真實社交」平台發文，講明「這是買入的大好時機！！！DJT。」DJT，其實就係代表「真實社交」平台母公司特朗普媒體科技集團嘅股票，結果，該股票9日收盤就升咗超過22%，有人統計過，特朗普當天財富暴增咗4.15億美元，即係超過30億港元。
呢啲已經係大約半個月前嘅新聞，筆者當然唔會單純用兩單舊聞「說明一切」，大約三、四日前，又有傳媒爆料，話特朗普長子、次子涉嫌喺兩間公司擔任顧問前趁機「低買高賣」，引起市場監管人員質疑，事件嘅起因，就係特朗普兩個仔一同喺一間金融科技公司做「顧問」，間公司喺今年2月宣布兩位公子加入，股票幾個星期內暴漲580%。
以為筆者已經講完？係未嘅！因為同樣係三、四日前，《彭博》就爆料，Facebook母公司Meta行政總裁朱克伯格（Mark Zuckerberg）、甲骨文行政總裁卡茲（Safra Catz）與摩根大通行政總裁戴蒙（Jamie Dimon）等商業巨頭，喺特朗普掟出關稅「炸彈」前，就已經拋售幾十億美元嘅股票，例如朱克伯格，今年第一季就拋售咗110萬股股票，總值大約56億港元；人稱「華爾街之王」嘅戴蒙，同期就大概拋售咗大約18億港元嘅股票。呢啲寡頭，到底係預判準確，定係有內幕消息？成件事真係耐人尋味。
股票市場，表面上公平，只要有錢，個個都可以買入賣出，但筆者想講，買入、賣出嘅權利係公平，但係資訊一向唔對等！普通人買賣股票，睇嘅就係傳媒報道等一般消息，進階少少，訂閱下啲財經人嘅頻道，攞多少少資訊；但有錢人呢，除咗本身財大氣粗，佢哋亦係最接近政府消息嘅人士之一，美國向來玩金權政治，只要特朗普身邊人以及富豪喺特朗普作出決策前得到消息，一波操作，就賺到普通人打一世工都唔會賺到嘅錢。
如果我哋將關稅戰視為美國扭轉貿易赤字嘅一場國際博弈，似乎特朗普每一步都好唔明智，因為美國股債匯三市一齊遭殃，國內又充滿怨言同反對聲音；但係呢，如果我哋將「對等關稅」視為美國寡頭一個「金錢遊戲」，成件事就合理好多喇！由特朗普自己公司、自己兒子、身邊好友同華爾街中人，都有媒體報道佢哋疑似獲利，如果所有事情屬實，美國總統真係世界第一肥缺，只要想要錢，喺政策上做幾多操作，事前身邊人知悉，就可以「齊齊發大財」。
最新消息，特朗普公開表示將會大幅下調對中國加徵關稅，但唔會降至零，又聲稱對中國友好，中方要同美國達成協議，美國白宮亦指總統同政府正在鋪路達成協議。呢場關稅戰，中國堅決唔跪，堅決反制，特朗普嘅立場亦一改再改，當稀思路口衰，如果Trump Trump賺夠，身邊寡頭又已經賺飽飽，好收手喇，中國人，不好惹！
收藏
取消收藏
分享
